Der ingen skulle tru at nokon kunne bu

For femten år sidan byrja Per Sørflaten eit nytt liv. Han ville ikkje vere slave av klokka og maskinen lenger. I staden søkte han fred og fridom i villmarka på Laksfjordvidda i Finnmark.

Elin Skålid og Tor Bolstad Jensen har saman med tre mindreårige born slege seg ned på den einslege, fråflytte fjellgarden Skålid i Fyresdal, der far til Elin kom frå. Der bryt dei opp jord, der byggjer dei hus og kraftverk og satsar på feavl.

22 år gamle Nils Christian Gjefsjø har nyleg teke over farsgarden, Gjevsjøen, inne ved svenskegrensa i Nord-Trøndelag. Der bur han saman med foreldra sine. Skal han til Snåsa, næraste bygd, lyt han gå tre mil til fots over fjellet.

I Åsligrenda vest for Dokka i Oppland driv Kari Nøssvold eit småbruk saman med mor si. Eit stykkje unna bur ei tante og ein onkel. Fleire er ikkje att i den før så folkerike fjellgrenda. Men no har Kari fått seg kjæraste, og snart skal ho bli mor.

For tre år sidan vende den 55 år gamle familiefaren Oddbjørn Selnes tilbake til barndomsheimen sin på Flatøy i Troms, ei øy utan rutesamband av noko slag. Der lever han som fiskarbonde.

Drøymer du om å leve nær naturen under enklare kår? Her møter du menneske som gjer nettopp det.